Radio Sele cuenta volver a les ondes a primeros de xunu

Radio Sele yá tien un local nuevu n'Uviéu, en Villafría 49, dende'l que cuenta volver a emitir na FM, nel 106.1, a últimos del mes de mayu o primeros de xunu. Pel momentu caltiénse la programación per internet, con 24 hores de música, amás de la retresmisión de los partíos de fútbol del Real Uviéu.Agora l'equipu de Radio Sele ta acondicionando'l local nuevu, depués de que les instalaciones que teníen en San Esteban se declararen en ruina. Según informó a esti mediu Xuanxo Mariño, responsable de la radio n'asturianu, la intención ye «volver a les ondes en cuantes que tea too preparao pa emitir en condiciones». El plazu que da Mariño ye d'unos quince díes, anque tovía nun hai una fecha fixa pa que'l 106.1 de la FM fale n'asturianu

*Nuncia estrayía de la edición dixital de Les Noticies